Autor

Opracowanie (indika 2026):
(tłumaczenie, analiza gramatyczna i syntaktyczna, objaśnienia)
Andrzej Babkiewicz

भागवतपुराणम्

Bhāgavata-purāṇam

Purana Bhagawata 

Księga 2 (dvitīya-skandhaḥ)

Bhagawata w czterech strofach (catuḥ-śloka-bhāgavatam)

Rozdział 2.10 (daśamo ‘dhyāyaḥ)

Dziesięć tematów (daśa-lakṣaṇa-kathanam)

Streszczenie rozdziału:

1-7

śrī-śuka uvāca

atra sargo visargaś ca
sthānaṃ poṣaṇam ūtayaḥ |
manvantareśānukathā
nirodho muktir āśrayaḥ ||2.10.1||

daśamasya viśuddhy-arthaṃ
navānām iha lakṣaṇam |
varṇayanti mahātmānaḥ
śrutenārthena cāñjasā ||2.10.2||

bhūta-mātrendriya-dhiyāṃ
janma sarga udāhṛtaḥ |
brahmaṇo guṇa-vaiṣamyād
visargaḥ pauruṣaḥ smṛtaḥ ||2.10.3||

sthitir vaikuṇṭha-vijayaḥ
poṣaṇaṃ tad-anugrahaḥ |
manvantarāṇi sad-dharma
ūtayaḥ karma-vāsanāḥ ||2.10.4||

avatārānucaritaṃ
hareś cāsyānuvartinām |
puṃsām īśa-kathāḥ proktā
nānākhyānopabṛṃhitāḥ ||2.10.5||

nirodho 'syānu śayanam
ātmanaḥ saha śaktibhiḥ |
muktir hitvānyathā-rūpaṃ
svarūpeṇa vyavasthitiḥ ||2.10.6||

ābhāsaś ca nirodhaś ca
yato ’sty adhyavasīyate |
sa āśrayaḥ paraṃ brahma
paramātmeti śabdyate ||2.10.7||

yo 'dhyātmiko 'yaṃ puruṣaḥ
so 'sāv evādhidaivikaḥ |
yas tatrobhaya-vicchedaḥ
puruṣo hy ādhibhautikaḥ ||2.10.8||

ekam ekatarābhāve
yadā nopalabhāmahe |
tritayaṃ tatra yo veda
sa ātmā svāśrayāśrayaḥ ||2.10.9||

puruṣo 'ṇḍaṃ vinirbhidya
yadāsau sa vinirgataḥ |
ātmano ’yanam anvicchann
apo ’srākṣīc chuciḥ śucīḥ ||2.10.10||

tāsv avātsīt sva-sṛṣṭāsu
sahasraṃ parivatsarān |
tena nārāyaṇo nāma
yad āpaḥ puruṣodbhavāḥ ||2.10.11||

dravyaṃ karma ca kālaś ca
svabhāvo jīva eva ca |
yad-anugrahataḥ santi
na santi yad-upekṣayā ||2.10.12||

eko nānātvam anvicchan
yoga-talpāt samutthitaḥ |
vīryaṃ hiraṇ-mayaṃ devo
māyayā vyasṛjat tridhā ||2.10.13||

adhi-daivam athādhy-ātmam
adhi-bhūtam iti prabhuḥ |
athaikaṃ pauruṣaṃ vīryaṃ
tridhābhidyata tac chṛṇu ||2.10.14||

antaḥ śarīra ākāśāt
puruṣasya viceṣṭataḥ |
ojaḥ saho balaṃ jajñe
tataḥ prāṇo mahān asuḥ ||2.10.15||

anu prāṇanti yaṃ prāṇāḥ
prāṇantaṃ sarva-jantuṣu |
apānantam apānanti
nara-devam ivānugāḥ ||2.10.16||

prāṇenākṣipatā kṣut
tṛḍ antarājāyate vibhoḥ |
pipāsato jakṣataś ca
prāṅ mukhaṃ nirabhidyata ||2.10.17||

mukhatas tālu nirbhinnaṃ
jihvā tatropajāyate |
tato nānā-raso jajñe
jihvayā yo ’dhigamyate ||2.10.18||

vivakṣor mukhato bhūmno
vahnir vāg vyāhṛtaṃ tayoḥ |
jale caitasya suciraṃ
nirodhaḥ samajāyata ||2.10.19||

nāsike nirabhidyetāṃ
dodhūyati nabhasvati |
tatra vāyur gandha-vaho
ghrāṇo nasi jighṛkṣataḥ ||2.10.20||

yadātmani nirālokam
ātmānaṃ ca didṛkṣataḥ |
nirbhinne hy akṣiṇī tasya
jyotiś cakṣur guṇa-grahaḥ ||2.10.21||

bodhyamānasya ṛṣibhir
ātmanas taj jighṛkṣataḥ |
karṇau ca nirabhidyetāṃ
diśaḥ śrotraṃ guṇa-grahaḥ ||2.10.22||

vastuno mṛdu-kāṭhinya-
laghu-gurv-oṣṇa-śītatām |
jighṛkṣatas tvaṅ nirbhinnā
tasyāṃ roma-mahī-ruhāḥ |
tatra cāntar bahir vātas
tvacā labdha-guṇo vṛtaḥ ||2.10.23||

hastau ruruhatus tasya
nānā-karma-cikīrṣayā |
tayos tu balavān indra
ādānam ubhayāśrayam ||2.10.24||

gatiṃ jigīṣataḥ pādau
ruruhāte ’bhikāmikām |
padbhyāṃ yajñaḥ svayaṃ havyaṃ
karmabhiḥ kriyate nṛbhiḥ ||2.10.25||

nirabhidyata śiśno vai
prajānandāmṛtārthinaḥ |
upastha āsīt kāmānāṃ
priyaṃ tad-ubhayāśrayam ||2.10.26||

utsisṛkṣor dhātu-malaṃ
nirabhidyata vai gudam |
tataḥ pāyus tato mitra
utsarga ubhayāśrayaḥ ||2.10.27||

āsisṛpsoḥ puraḥ puryā
nābhi-dvāram apānataḥ |
tatrāpānas tato mṛtyuḥ
pṛthaktvam ubhayāśrayam ||2.10.28||

āditsor anna-pānānām
āsan kukṣy-antra-nāḍayaḥ |
nadyaḥ samudrāś ca tayos
tuṣṭiḥ puṣṭis tad-āśraye ||2.10.29||

nididhyāsor ātma-māyāṃ
hṛdayaṃ nirabhidyata |
tato manaś candra iti
saṅkalpaḥ kāma eva ca ||2.10.30||

tvak-carma-māṃsa-rudhira-
medo-majjāsthi-dhātavaḥ |
bhūmy-ap-tejo-mayāḥ
sapta prāṇo vyomāmbu-vāyubhiḥ ||2.10.31||

guṇātmakānīndriyāṇi
bhūtādi-prabhavā guṇāḥ |
manaḥ sarva-vikārātmā
buddhir vijñāna-rūpiṇī ||2.10.32||

etad bhagavato rūpaṃ
sthūlaṃ te vyāhṛtaṃ mayā |
mahy-ādibhiś cāvaraṇair
aṣṭabhir bahir āvṛtam ||2.10.33||

ataḥ paraṃ sūkṣmatamam
avyaktaṃ nirviśeṣaṇam |
anādi-madhya-nidhanaṃ
nityaṃ vāṅ-manasaḥ param ||2.10.34||

amunī bhagavad-rūpe
mayā te hy anuvarṇite |
ubhe api na gṛhṇanti
māyā-sṛṣṭe vipaścitaḥ ||2.10.35||

sa vācya-vācakatayā
bhagavān brahma-rūpa-dhṛk |
nāma-rūpa-kriyā dhatte
sa-karmākarmakaḥ paraḥ ||2.10.36||

prajāpatīn manūn devān
ṛṣīn pitṛ-gaṇān pṛthak |
siddha-cāraṇa-gandharvān
vidyādhrāsura-guhyakān ||2.10.37||

kinnarāpsaraso nāgān
sarpān kimpuruṣān narān |
mātṛ-rakṣaḥ-piśācāṃś ca
preta-bhūta-vināyakān ||2.10.38||

kūṣmāṇḍonmāda-vetālān
yātudhānān grahān api |
khagān mṛgān paśūn vṛkṣān
girīn nṛpa sarīsṛpān ||2.10.39||

dvi-vidhāś catur-vidhā ye
'nye jala-sthala-nabhaukasaḥ |
kuśalākuśalā miśrāḥ
karmaṇāṃ gatayas tv imāḥ ||2.10.40||

sattvaṃ rajas tama iti
tisraḥ sura-nṛ-nārakāḥ |
tatrāpy ekaikaśo rājan
bhidyante gatayas tridhā |
yadaikaikataro 'nyābhyāṃ
svabhāva upahanyate ||2.10.41||

sa evedaṃ jagad-dhātā
bhagavān dharma-rūpa-dhṛk |
puṣṇāti sthāpayan viśvaṃ
tiryaṅ-nara-surādibhiḥ ||2.10.42||

tataḥ kālāgni-rudrātmā yat
sṛṣṭam idam ātmanaḥ |
sanniyacchati tat kāle
ghanānīkam ivānilaḥ ||2.10.43||

ittham-bhāvena kathito
bhagavān bhagavat-tamaḥ |
nettham-bhāvena hi paraṃ
draṣṭum arhanti sūrayaḥ ||2.10.44||

nāsya karmaṇi janmādau
parasyānuvidhīyate |
kartṛtva-pratiṣedhārthaṃ
māyayāropitaṃ hi tat ||2.10.45||

ayaṃ tu brahmaṇaḥ kalpaḥ
sa-vikalpa udāhṛtaḥ |
vidhiḥ sādhāraṇo yatra
sargāḥ prākṛta-vaikṛtāḥ ||2.10.46||

parimāṇaṃ ca kālasya
kalpa-lakṣaṇa-vigraham |
yathā purastād vyākhyāsye
pādmaṃ kalpam atho śṛṇu ||2.10.47||

śaunaka uvāca

yad āha no bhavān sūta
kṣattā bhāgavatottamaḥ |
cacāra tīrthāni bhuvas
tyaktvā bandhūn sudustyajān ||2.10.48||

kṣattuḥ kauśāraves tasya
saṃvādo 'dhyātma-saṃśritaḥ |
yad vā sa bhagavāṃs tasmai
pṛṣṭas tattvam uvāca ha ||2.10.49||

brūhi nas tad idaṃ saumya
vidurasya viceṣṭitam |
bandhu-tyāga-nimittaṃ ca
yathaivāgatavān punaḥ ||2.10.50||

sūta uvāca

rājñā parīkṣitā pṛṣṭo
yad avocan mahā-muniḥ |
tad vo ’bhidhāsye śṛṇuta
rājñaḥ praśnānusārataḥ ||2.10.51||

iti śrīmad-bhāgavate mahā-purāṇe
brahma-sūtra-bhāṣye
pārama-haṃsyāṃ saṃhitāyāṃ
vaiyāsikyāṃ
dvitīya-skandhe catuḥ-śloka-bhāgavate
daśa-lakṣaṇa-kathanaṃ nāma
daśamo ‘dhyāyaḥ ||2.10||

Oto w chwalebnej wielkiej puranie Bhagawata,
w komentarzu do Sutr wedanty,
w piśmie najlepszych z ascetów,
w utworze syna Wjasy,
w drugiej księdze, w Bhagawatcie w czterech strofach,
rozdział dziesiąty zatytułowany
„Dziesięć tematów”.