Autor

Opracowanie (indika 2026):
(tłumaczenie, analiza gramatyczna i syntaktyczna, objaśnienia)
Andrzej Babkiewicz

भागवतपुराणम्

Bhāgavata-purāṇam

Purana Bhagawata 

Księga 2 (dvitīya-skandhaḥ)

Bhagawata w czterech strofach (catuḥ-śloka-bhāgavatam)

Rozdział 2.9 (navamo ‘dhyāyaḥ)

Ujrzenie Waikunty (vaikuṇṭa-darśanam)

Streszczenie rozdziału:

1-7

śrī-śuka uvāca

ātma-māyām ṛte rājan
parasyānubhavātmanaḥ |
na ghaṭetārtha-sambandhaḥ
svapna-draṣṭur ivāñjasā ||2.9.1||

bahu-rūpa ivābhāti
māyayā bahu-rūpayā |
ramamāṇo guṇeṣv asyā
mamāham iti manyate ||2.9.2||

yarhi vāva mahimni sve
parasmin kāla-māyayoḥ |
rameta gata-sammohas
tyaktvodāste tadobhayam ||2.9.3||

ātma-tattva-viśuddhy-arthaṃ
yad āha bhagavān ṛtam |
brahmaṇe darśayan rūpam
avyalīka-vratādṛtaḥ ||2.9.4||

sa ādi-devo jagatāṃ paro guruḥ
sva-dhiṣṇyam āsthāya sisṛkṣayaikṣata |
tāṃ nādhyagacchad dṛśam atra sammatāṃ
prapañca-nirmāṇa-vidhir yayā bhavet ||2.9.5|| ज

sa cintayan dvy-akṣaram ekadāmbhasy
upāśṛṇod dvir-gaditaṃ vaco vibhuḥ |
sparśeṣu yat ṣoḍaśam ekaviṃśaṃ
niṣkiñcanānāṃ nṛpa yad dhanaṃ viduḥ ||2.9.6|| उ

niśamya tad-vaktṛ-didṛkṣayā diśo
vilokya tatrānyad apaśyamānaḥ |
sva-dhiṣṇyam āsthāya vimṛśya tad dhitaṃ
tapasy upādiṣṭa ivādadhe manaḥ ||2.9.7|| उ

divyaṃ sahasrābdam amogha-darśano
jitānilātmā vijitobhayendriyaḥ |
atapyata smākhila-loka-tāpanaṃ
tapas tapīyāṃs tapatāṃ samāhitaḥ ||2.9.8|| ज

tasmai sva-lokaṃ bhagavān sabhājitaḥ
sandarśayāmāsa paraṃ na yat-param |
vyapeta-saṅkleśa-vimoha-sādhvasaṃ
sva-dṛṣṭa-vadbhir puruṣair abhiṣṭutam ||2.9.9|| ज

pravartate yatra rajas tamas tayoḥ
sattvaṃ ca miśraṃ na ca kāla-vikramaḥ |
na yatra māyā kim utāpare harer
anuvratā yatra surāsurārcitāḥ ||2.9.10|| ज

śyāmāvadātāḥ śata-patra-locanāḥ
piśaṅga-vastrāḥ surucaḥ supeśasaḥ |
sarve catur-bāhava unmiṣan-maṇi-
praveka-niṣkābharaṇāḥ suvarcasaḥ |
pravāla-vaidūrya-mṛṇāla-varcasaḥ
parisphurat-kuṇḍala-mauli-mālinaḥ ||2.9.11|| ज

bhrājiṣṇubhir yaḥ parito virājate
lasad-vimānāvalibhir mahātmanām |
vidyotamānaḥ pramadottamā-dyubhiḥ
sa-vidyud-abhrāvalibhir yathā nabhaḥ ||2.9.12|| ज

śrīr yatra rūpiṇy uru-gāya-pādayoḥ
karoti mānaṃ bahudhā vibhūtibhiḥ |
preṅkhaṃ śritā yā kusumākarānugair
vigīyamānā priya-karma gāyatī ||2.9.13|| ज

dadarśa tatrākhila-sātvatāṃ patiṃ
śriyaḥ patiṃ yajña-patiṃ jagat-patim |
sunanda-nanda-prabalārhaṇādibhiḥ
sva-pārṣadāgraiḥ parisevitaṃ vibhum ||2.9.14|| ज

bhṛtya-prasādābhimukhaṃ dṛg-āsavaṃ
prasanna-hāsāruṇa-locanānanam |
kirīṭinaṃ kuṇḍalinaṃ catur-bhujaṃ
pītāṃśukaṃ vakṣasi lakṣitaṃ śriyā ||2.9.15|| ज

adhyarhaṇīyāsanam āsthitaṃ paraṃ
vṛtaṃ catuḥ-ṣoḍaśa-pañca-śaktibhiḥ |
yuktaṃ bhagaiḥ svair itaratra cādhruvaiḥ
sva eva dhāman ramamāṇam īśvaram ||2.9.16|| ज

tad-darśanāhlāda-pariplutāntaro
hṛṣyat-tanuḥ prema-bharāśru-locanaḥ |
nanāma pādāmbujam asya viśva-sṛg
yat pāramahaṃsyena pathādhigamyate ||2.9.17|| ज

taṃ prīyamāṇaṃ samupasthitaṃ kaviṃ
prajā-visarge nija-śāsanārhaṇam |
babhāṣa īṣat smita-śociṣā girā
priyaḥ priyaṃ prītamanāḥ kare spṛśan ||2.9.18|| ज

śrī-bhagavān uvāca

tvayāhaṃ toṣitaḥ samyag
veda-garbha sisṛkṣayā |
ciraṃ bhṛtena tapasā
dus-toṣaḥ kūṭa-yoginām ||2.9.19||

varaṃ varaya bhadraṃ te
vareśaṃ mābhivāñchitam |
brahmañ chreyaḥ-pariśrāmaḥ
puṃsāṃ mad-darśanāvadhiḥ ||2.9.20||

manīṣitānubhāvo 'yaṃ
mama lokāvalokanam |
yad upaśrutya rahasi
cakartha paramaṃ tapaḥ ||2.9.21||

pratyādiṣṭaṃ mayā tatra
tvayi karma-vimohite |
tapo me hṛdayaṃ sākṣād
ātmāhaṃ tapaso 'nagha ||2.9.22||

sṛjāmi tapasaivedaṃ
grasāmi tapasā punaḥ |
bibharmi tapasā viśvaṃ
vīryaṃ me duścaraṃ tapaḥ ||2.9.23||

brahmovāca

bhagavan sarva-bhūtānām
adhyakṣo 'vasthito guhām |
veda hy aprati-ruddhena
prajñānena cikīrṣitam ||2.9.24||

tathāpi nāthamānasya
nātha nāthaya nāthitam |
parāvare yathā rūpe
jānīyāṃ te tv arūpiṇaḥ ||2.9.25||

yathātma-māyā-yogena
nānā-śakty-upabṛṃhitam |
vilumpan visṛjan gṛhṇan
bibhrad ātmānam ātmanā ||2.9.26||

krīḍasy amogha-saṅkalpa
ūrṇa-nābhir yathorṇute |
tathā tad-viṣayāṃ dhehi
manīṣāṃ mayi mādhava ||2.9.27||

bhagavac-chikṣitam ahaṃ
karavāṇi hy atandritaḥ |
nehamānaḥ prajā-sargaṃ
badhyeyaṃ yad-anugrahāt ||2.9.28||

yāvat sakhā sakhyur iveśa te kṛtaḥ
prajā-visarge vibhajāmi bho janam |
aviklavas te parikarmaṇi sthito
mā me samunnaddha-mado ‘ja-māninaḥ ||2.9.29|| ज

śrī-bhagavān uvāca

jñānaṃ parama-guhyaṃ me
yad vijñāna-samanvitam |
sa-rahasyaṃ tad-aṅgaṃ ca
gṛhāṇa gaditaṃ mayā ||2.9.30||

yāvān ahaṃ yathā-bhāvo
yad-rūpa-guṇa-karmakaḥ |
tathaiva tattva-vijñānam
astu te mad-anugrahāt ||2.9.31||

aham evāsam evāgre
nānyad yat sad asat param |
paścād ahaṃ yad etac ca
yo 'vaśiṣyeta so ’smy aham ||2.9.32||

ṛte ’rthaṃ yat pratīyeta
na pratīyeta cātmani |
tad vidyād ātmano māyāṃ
yathābhāso yathā tamaḥ ||2.9.33||

yathā mahānti bhūtāni
bhūteṣūccāvaceṣv anu |
praviṣṭāny apraviṣṭāni
tathā teṣu na teṣv aham ||2.9.34||

etāvad eva jijñāsyaṃ
tattva-jijñāsunātmanaḥ |
anvaya-vyatirekābhyāṃ
yat syāt sarvatra sarvadā ||2.9.35||

etan mataṃ samātiṣṭha
parameṇa samādhinā |
bhavān kalpa-vikalpeṣu
na vimuhyati karhicit ||2.9.36||

śrī-śuka uvāca

sampradiśyaivam ajano
janānāṃ parameṣṭhinam |
paśyatas tasya tad-rūpam
ātmano nyaruṇad dhariḥ ||2.9.37||

antar-hitendriyārthāya
haraye vihitāñjaliḥ |
sarva-bhūta-mayo viśvaṃ
sasarjedaṃ sa pūrvavat ||2.9.38||

prajāpatir dharma-patir
ekadā niyamān yamān |
bhadraṃ prajānām anvicchann
ātiṣṭhat svārtha-kāmyayā ||2.9.39||

taṃ nāradaḥ priyatamo
rikthādānām anuvrataḥ |
śuśrūṣamāṇaḥ śīlena
praśrayeṇa damena ca ||2.9.40||

māyāṃ vividiṣan viṣṇor
māyeśasya mahā-muniḥ |
mahā-bhāgavato rājan
pitaraṃ paryatoṣayat ||2.9.41||

tuṣṭaṃ niśāmya pitaraṃ
lokānāṃ prapitāmaham |
devarṣiḥ paripapraccha
bhavān yan mānupṛcchati ||2.9.42||

tasmā idaṃ bhāgavataṃ
purāṇaṃ daśa-lakṣaṇam |
proktaṃ bhagavatā prāha
prītaḥ putrāya bhūta-kṛt ||2.9.43||

nāradaḥ prāha munaye
sarasvatyās taṭe nṛpa |
dhyāyate brahma paramaṃ
vyāsāyāmita-tejase ||2.9.44||

yad utāhaṃ tvayā pṛṣṭo
vairājāt puruṣād idam |
yathāsīt tad upākhyāsye
praśnān anyāṃś ca kṛtsnaśaḥ ||2.9.45||

iti śrīmad-bhāgavate mahā-purāṇe
brahma-sūtra-bhāṣye
pārama-haṃsyāṃ saṃhitāyāṃ
vaiyāsikyāṃ
dvitīya-skandhe catuḥ-śloka-bhāgavate
vaikuṇṭa-darśanaṃ nāma
navamo ‘dhyāyaḥ ||2.9||

Oto w chwalebnej wielkiej puranie Bhagawata,
w komentarzu do Sutr wedanty,
w piśmie najlepszych z ascetów,
w utworze syna Wjasy,
w drugiej księdze, w Bhagawatcie w czterech strofach,
rozdział dziewiąty zatytułowany
„Ujrzenie Waikunty”.